آنا وطن

نه گؤزه ل سن آنا وطن

سن سن منه آنا، وطن

گول چیچکلی باغلارین وار

چوخ ویقارلی داغلارین وار

تاریخینه وورغونام من

شهریارام وورغون ام من

قوینوندا بسله دین منی

چوخ سئویرم منده سنی

وطن وطن جانیم وطن

داماردا آل قانیم وطن

سن آنامسام همده آتام

نئجه اولار سنی آتام

عشقین اولوب منیم جانیم

فخرین اولوب آدیم سانیم

شرف غئیرت کانی وطن

سئومه یه نین هانی وطن

قوینوندا بسله دین منی

اونوتمارام بیر آن سنی

وطن وطن جانیم وطن

داماردا آل قانیم وطن

                                     A.R.SESSIZ

بیلمه­دیم

دیلبرین لــعل لـبیندن بـوسه آلـدیـم بیلمه­دیـم

بوسه مست ائتدی منی قوینوندا قالدیم بیلمه­دیم

شـهد شیرین تک لب دیلبر منی مدهوش ائدیب

بیر عـؤمور معشوقه­سیز دونیاده قالدیم بیلمه­دیم

روحومو چرخ فلک دیلبرسیز ائـتمیش نئیله­ییم

عشقی اؤز فیکریمده من آواره سالدیم بیلمه­دیم

نئیله­دیم فیکریم منیم کؤنلومه هئچ یار اولمادی

گاهدان اویدوم باشیما هم فیکره دالدیم بیلمه­دیم

دیلبرین عشقی دولوب کونلوم داشیر باشدان باشا

تار کامانچام اولمادی دونبک له چالدیم بیلمه­دیم

ساچلاریم دن دن آغاردی تئل لریم الدن گئـدیر

دورر تک عؤمرو سراسر داشه چالدیم بیلمـه­دیم

عشق سولطانی منیم روحومدا جولان ائیـله دی

دیلبریمدن بیر عؤمور من آیری قالدیم بیلمـه­دیم

A.R.SESSIZ

معلم

ایشیقلی سان نورلو سان حرارت لی دونیاسان

وارلیـــق اوزره، حـــــیاتا طراوت لی دونیا سان

سندن آلیـــــــر کایــــــنات یاشایشین معناسین

اولــــــو آتـــــا بابــادان روایت لی دونیا سان

سنین دئدیک لرین له اوره ک گؤزون آچیریق

بیــــزه باخیش وئرماغا سخاوت لی دونیا سان

سن گؤزومون نوروسان اوره ییمین سئوگیسی

محبـــت ده، سئوگی ده، قیامت لی دونیاسان

سن اولماسان بیلمه ریک بیر نَدی یا یوز نَدی

تانری قبول ائتمه گه مین آیت لی دونیاسان

اوزاق کنـــــده اوبایــــا عاشــــقانه گئـدیر سن

بیر اؤیرَنجین اولـــسادا صلابت لی دونیاسان

سن ایلــــه معــنا تاپیر فیکریمیزده کی سؤزلر

هــــر ســؤزومه فیکریمه امانت لی دونیاسان

گون به گون آرتیــرسنین عزتین عالمده بیل

بوتون بـــو اینسان لارا کرامت لی دونیاسان

غمین دردین اولــــسادا آرزولارین ســولسادا

بیـــــــــزیم بــو قلبیمیزده ولایت لی دونیاسان

سن یول آچیرسان بیزه اوره ک سؤزون دئماغا

یـــاخشی یا دا پیــــسه ده رضایت لی دونیاسان

چوخ سؤزومو بیلمیره م الیف نه دی ب نه دی

عالــــــمین اســـــــرارینا دلالت لی دونیا سان

آجیقــلی اولساندا سن، هاممینی چوخ سئویرسن

بیــــــر فیــــــکیرلی آنا تـــک لطافت لی دونیاسان

چـــوخلاری بیلمیــر کی سن فیکیرچی سن نه زرچی

اؤز باهــــــا ســـــرمایه نه کرامت لی دونیاسان

پاییزدادا قیش دادا ســــؤزون گـول تک آچیلیر

اؤلــــکه میزین یازی تک لطافت لی دونیاسان

فیـــکیر سیز اولسام بیر آن، یوردوما باغلانماسام

بیــــــر مئهــــریبان باجـــی تک ملالت لی دونیاسان

همیشه قارشیمـــــــداسان تـازه بیر باخیش ایله

هـــر ســــؤزومه فیــکریمه دلالت لی دونیاسان

محبتین لـــذتیـــــن، سنــــله دوشـــوندوم اینان

مینـــــلرجه اؤیرنجی یـــه، شرافت لی دونیاسان

هـــاردا دئدیم دانیشـدیم، دینمه دانیشما گؤردوم

منیـــــم بــوتــون دویغـوما طراوت لی دونیاسان

آنام آتامسان منیــــم سـن اؤزومده ن اؤزومسن

اویغـــــوما هم دویغـــــوما صداقت لی دونیاسان

منیــــم دیلک لریمی ایسته ییمی آنــــــــلادین

اینجـــــه ایپــــک قلبـــلی نجابت لی دونیاسان

دینیــــب دانیشــاندا من ساغدا سولدا دانلاییر

منیم هــر بیــر سؤزومه قضاوت لی دونیا سان

سن عالــــمین دردینه عــلاج ائدیرسن هر آن

کافــــره هــــم مــــؤمنه شفاعت لی دونیاسان

کــــرامت آرتیـر داشیر باخیشیندان اوزونده ن

دونیــــــانین احوالیــنه قناعت لی دونیا سان

گؤندوز ایتیـــر دیک یولو، قالدیق آواره چؤلده

قارانلیق توتان یـــولا بصارت لی دونیا سان

مین جوره اینسان گــه لیر سنین کیلاس لارینا

هـــر بیرینه مین جـــوره حکایت لی دونیا سان

تکجه الیف بِئی دئییل، بیر یا ایکی، اوچ دئییل

منیـــم اوره ک اوردوما شجاعت لی دونیاسان

حیات بیـر آیری یولدا، سن عشقینین یولوندا

معـــــشوقون جفاسیـــــنا دیانت لی دونیاسان

قیشدا قاردا کولکده صاف عشقین وار اورکده

قــوروتولــماز بو دیلک ده شرافتلی دونیاسان

(سه س سیز) ه سه س وئریرسن قورخولاری قووورسان

بوتون کــور دیلک لــره ضیافت لی دونیاسان

A.R.SESSIZ

یاز گلدی

یاز گلدی چیچک لر دانیشیر بولبول ایلن

یئل باغرین آچیبدیر اؤپوشور سونبول ایلن

دوزلرده و چؤل لرده گَََََََزیر شئه چمنی

گون گون بوی آتیر باغچامیزین یاسمنی

داغلاردا و باغلاردا یاغیر یاز یاغیشی

ائل کؤنلونو اوخشور کهلیگین ناز باخیشی

یئملیک گؤبه لک دونبالان ایت بورنو چیخیر

آلچایلا دولان باغلار آغاجلاری ییخیر

تورپاغ گؤیه ریر گؤم گؤی اولور داغ دره لر

قیزلار و گلین لرده ییغیر بول تره لر

بول بول زمی لردن بوی آتیر غاز آیاغی

اوشقون و بیزوبورنو ستلجم آلاغی

گؤم گؤی گؤیه ریر گزنه و تورشک چوبانک

سالمانچا وقانقال چیریش ایله بابانک

باخ گؤر بوی آتیب کندیمیزین شاه تره سی

خاشخاشی، توهلوجه سی، همده اود تره سی

درمان ساییلیر چؤلده کی هر بیتگی بیزه

تانریم یارادیب بیتگینی هر دردیمیزه

ذووق ایله گَزین چؤل لری ای اهل وطن

بلکه دیریلیب عشقه گله روح ایله تن

(سه س سیز) دئمیرم های سالیرام خالقیما من

چیخ چؤل لره، ایسلان، اوشو، بات پالچیغا سن

                  A.R. (SESSIZ)

فانی دونیا

بیلین دوستلار بو دونیا فانی دیر فانی

وفاسی وارسا گر، سؤیله گؤروم هانی

صفا و عشق و مهر و خوش کئچیرمک له

حیاتین هر صداسیندا اولون بانی

محبت سئوگی دیر بیزدن قالان یالنیز

دوشونمک دیر حیاتین عزتی شانی

صداقت معرفتله یئر سالین دیلده

فقط اینسانی قان، بوشلا به یی خانی

بوگون وارسان، صاباحدان یوخدور اخبارین

قوجاغلا مئهریله سن دوستو دوشمانی

یئرین یوردون قانان کس لرله اول همدم

قانانلاردیر حیات ایچره بالین شانی

صفادن ذووق آلار هر دم قانان اینسان

عؤمور وارکن گز اینسانی آرا تانی

A.R SESSIZ

ایستر

کؤنلوم سنی ای گول گئجه گوندوز سحر ایستر

احوالینی هر آندا اؤزومدن بَتَر ایستر

یوخدور سنه تای سئوگیلی جانان بو جاهاندا

سئومکله ووروللام جانیم الدن گئدر ایستر

من عشق ایله، آسوده لیگی وئرمیشم الدن

سن بیلمه دین عشق عالمی سندن نه لر ایستر

سن سن منیم عالمده اینان سئوگی پناهیم

کؤنلوم قوزو تک مهرینی هر آن مه لر ایستر

یاندیم و کول اولدوم سنین عشقینده من هر آن

گؤز یولداکی یار جانیمی بیردن گه لر ایستر

غم سؤیله مه غمدن دئمه گه ل (سَس سیز)ه رحم ائت

بیر گؤر بو یازیق کؤنلو پریشان نه لر ایستر 

سیگــار

چوخ عجیب گولمه لی سیگار چکیسن

ایتیل اؤل اؤلــمه لی سیگار چکسین

وئـرمیسن پـول لارینی مـــال بوغانا

لعنــت اولــسون سنه سیگار ساتانا

پـوفـلویورســن بـو یـانـا هـم اویانا

پول قــوتولوب بسته اولــموش دانا

چوخ عجیب گولمه لی سیگار چکیسن

ایتیـل اؤل اؤلـمه لی سیگار چکیسن

مکــتبدن ائتــدین اؤزونـــو آسـوده

آتیبـــسان کیــتاب و دفــتـری دوره

چوخ چکیب پاپریزی اوخشورسان موره

اولمـوسـان اینـدی ایکی جور بیر جوره

چوخ عجیب گولمه لی سیگار چکیسن

ایتیـل اؤل اؤلمـه لی سیگار چکیسن

کیــمی اؤیــرتدی بــو سیـگاری سنه

پاپیـشیبــدیــر سنـــه او مثــل گنه

کــی دئـییرسن «بیر نفس ووردا» منه

ســارالیــب اوز چــورویــوبــدور اتنه

چوخ عجیب گولمه لی سیگار چکیسن

ایتیــل اؤل اؤلمه لی سیگار چکیسن

دوروســان کـــوچه باشیندا گئجه لر

آز قــالیر نه نه ن بابان جان ائده لر

تـرک سیگاری نه نه ن چوخ سئوه لر

دئییسن ترک قیلان بس نئجه ائله ر

چوخ عجیب گولمه لی سیگار چکیسن

ایتیــل اؤل اؤلمه لی سیکار چکسین

توســدونون خیری سنه یوخدور اینان

بــو سؤزه سنــده یئتیر دین و ایمان

حق ســؤزه ائتــمه حیـاتیندا گومان

بوغــار آخیر سنــی بو توستو دومان

چوخ عجیب گولمه لی سیگار چکیسن

ایتیــل اؤل اؤلمه لی سیکار چکسین

آییــل اوغــلان نیـیه سیگار چکیسن

مغزه علــم اک نییه سیــگار اکیسن

گــؤرونـــور تیریاکـا معتاد تکی سن

ووروســان سیگارا زورلا پــــوکی سن

چوخ عجیب گولمه لی سیگار چکیسن

ایتیــل اؤل اؤلمه لی سیگار چکیسن

چــوخ چکیبسن اولـوسان تنگی نفس

گئتدی سیگار چکمییه ن سنده ته له س

اولاجـــــاق اوز ائـــولادیندا بو هوس

چون سؤزون افـکارین اولوبدور نحس

چوخ عجیب گولمه لی سیگار چکیسن

ایتیـــل اؤل اؤلمه لی سیکار چکیسن

اؤلـــوب عقلیـن شعورون زایل، آییل

تــرک ائله سیـگاری، ده «پاتتا پاخیل»

قوی سئوینسین بو ایشه دوست و فامیل

بو ضــــــلالت کؤرپوسون سنده آتیل

چوخ عجیب گولمه لی سیگار چکیسن

آییـــــل اوغلان نییه سیگار چکیسن

sessiz

قیش گلدی وطنداش ائوی یوخدور

غم غصه سی بولدور داها چوخدور

یاس توره نی دولوب خالقین کونلونه

وطنیم غصه ده وطنیم غمده

عشقیم سئوگیم جانیم چیخیب یادیمدان

وطنیم غصه ده وطنیم غمده

قارا دومان هارای سالدی وطنده

مینلر اینسان ائوسیز قالدی وطنده

کدرله غم چالقی چالدی وطنده

وطنیم غصه ده وطنیم غمده

وطنیم آغلاییر کونلومو یاخیر

گویدن کدر یاغیر یئرده غم آخیر

آغری وورور آجی شیمشک تک چاخیر

وطنیم غصه ده وطنیم غمده

وطنیم غصه ده وطنیم غمده

A.R... SESSIZ

سنسیز اولمور

سنی منده ن آییرانا سؤزوم وار

 منده اینان حیات بویدا دؤزوم وار

اودا سویا دوشوب یولدان کئچه ره م

اوزون ایللر سنده منیم گؤزوم وار

سنسیز اولمور سنسیز لال دی بو کؤنلوم

بوتون دولو قالماقال دی بو کؤنلوم

هر آن سنله هم خیال دی بو کؤنلوم

سنی گؤرسم سنه چوخلو سؤزوم وار

سنی گؤرسم سنه چوخلو سؤزوم وار

         A.R...SESSIZ

گول

گیزلی قالمیش کؤنول داغی دئییلسن

اوره ک سیخان آخشام چاغی دئییلسن

گؤزه ل یارسان سن کی یاغی دئییلسن

گول گول اوچون گولده گولسون سن اوچون

قاباقجیل اول اویناماغا گولماغا

جان آتما سن سارالماغا سولماغا

فیکیر وئرمه غم کدره دولماغا

گول گول اوچون گولده گولسون سن اوچون

مئهریبان اول دوستونا هم دوشمنه

کؤنول وئرسین یاغی سنه یار سنه

همیشه لیک بیرجه سؤزوم وار سنه

گول گول اوچون گولده گولسون سن اوچون

بوگون وارام صاباح یوخام بلکه ده

من اینسانام سئوگیلی یم هر کسه

آغلاما هئچ حیاتیندا بیر کره

گول گول اوچون گولده گولسون سن اوچون

گولوش وئره ر حیاتا یئنی لیک لر

یئتر بیر گون سونا بو دیری لیک لر

غرورسوز اول بار وئرمز ایری لیک لر

گول گول اوچون گولده گولسون سن اوچون

خوش باخیش اول قوجایا هم جاوانا

اومید قالما باش اوستونده تاوانا

دؤزوملو اول توخلوغا هم یاوانا

گول گول اوچون گولده گولسون سن اوچون

بو حیاتا دردده غصه ده یاردی

گئنیش دونیا بؤیوک اینسانا داردی

اولسون کی غم کدرده واردی

گول گول اوچون گولده گولسون سن اوچون

دئییب گولمک اینسانی شنلندیره ر

یئری گؤیو داشی دا دیللندیره ر

غصه هردم حیاتی لیللندیره ر

گول گول اوچون گولده گولسون سن اوچون

A.R....SESSIZ

ویجدان عذابی

دهشت لی گؤرونموش اینسانین ویجدان عذابی

یئتمز اونـــا ایللـــر بـویـونــون زینــدان عذابی

سایما بــو حیات فلسفه سیز، گه لدی گئده ردی

عــاشق لــر اؤلنــده آپــاریــر هیجـــران عذابی

سن مئهرینی گؤستر بوتون ائللر گولوش ائتسین

قوی ائلده ن اوزاقلاشسین ائــله حــرمان عذابی

گــؤز یوممـا بو دونیا ائوی نین جنب و جوشوونا

قــویــما ائده بیــر اینسانــا بیــر انسان عذابی

دوز توت یولووو، ظلمیله یوخ حاق ایله دوز گئت

تا چکــمه یه سن عؤمـرونــو سن ایمان عذابی

حاق پنجه سی نین قـدرتی آســوده جــه یاتماز

دوستــاقدادا مـین ییــل چـکه گر زیندان عذابی

کس دوغرا منی،«سس سیز»ی جان اوسته بوراخ گئت

قــویما چکــم آمــما بیــرجـه آن ویـــجدان عذابی

A.R... SESSIZ

تک اولدوز

ای گــؤزه ل سن بوقده ر عشــــوه و ناز ائیله مه گه ل

اؤز وفاداریــــنا سن، لـــوطــفونــــو آز ائیله مه گه ل

آییــــل اویمــــــا او رقیبه، او سنه یــــــار دئگــیل

پاییـــز اولـــموش او رقیبیم، اونــو یاز ائیله مه گه ل

زولفونــــو قــوی داراسین کیم کی سنی چـوخلو سئویر

سنه سه س وئرمز، او یاش تاختانی ســـاز ائیله مه گل

بوقدر کــی ســـنه اویموش منیـــــــم آسوده باشیم

کؤنلوون سیــررینی آچ، سئــوگی نـی راز ائیله مه گه ل

سن سئوینج آخشامی نین گؤیده کـی تـک اولدوزوسان

هامینی یولدا بوراخ،« سس سیز» ه نـــاز ائیله مه گه ل

                                        A.R.... SESSIZ

بیر آن عؤمرو

عزیز یولداش سه سین گه لمیر نه واخ دیر

تئلیم ایچره بارماخلاریم داراخ دیر

گئجه لرده کؤنلوم فیکریم اویاخ دیر

عشق اودیله آلوولانیب آلیش یان

منی آنلا منی دوشون منی قان

حیات بیزیم بیر کئچه ری یولوموز

قوشالاشمیر ساغیمیزلا سولوموز

داها گه لمیر یاغموروموز دولوموز

برکتسیز اولوب یام یاشیل اورمان

منی آنلا منی دوشون منی قان

سئوگی داها یالان سؤزه بنزه ییر

سینیق شوشه یئرده گؤزه بنزه ییر

الده ن گئده ن کؤنلوموزه بنزه ییر

گونش باتدی بیر آز سونرا باتار دان

منی آنلا منی دوشون منی قان

یاشاماقدیر شیرینلیغی حیاتین

کؤچوب گئدیب چوخدا بؤیوک سلاطین

یاشاماسان اؤلوم چاپار قیر آتین

یئه ایچ و گول طبیعتی سن دولان

منی آنلا منی دوشون منی قان

کئچمیش آنلار گئری دؤنمز بیرجه آن

غم ائیله مه غصه یئمه بیر دایان

سوندا بیر دیر آنلایانلا اوینایان

کیمسه ده ن یوخ نه بیر خبر نه هایان

منی آنلا منی دوشون منی قان

پاسلی دمیر سانکی کؤز تک گؤرونور

یاشامایان حیات بویو سورونور

بوتون عؤمرون بوش زحمته بورونور

کئچمیشی سیل گه له جه یی آتگینان

بو بیر آنی یاشاگینان قانگینان

                    A.R... SESSIZ

سن روحوم، اینام، دین ایله ایمان منی بک له

سنسیز یاشاماز بیرجه آن عشقیله حیاتیم

ای جان جییه ریم سئومه لی جئیران منی بک له

عشقین دالانیب کؤنلومون آوازه سین آلمیش

کؤنلومده کی عشق، ایمانا دیوان منی بک له

سس سیزجه سیزیلدار اوره ییم، تک سنی سئومیش

کؤنلومله بو عالم سنه حئیران منی بک له

سنسن بو کونول آتشینه آب حیاتیم

عشقیندی منه روضه ی رضوان منی بک له

یانمیش اوره ییم بیر نئچه هیجرانین اودوندا

ای حال پریشانیما سامان منی بک له

سن، سوس دئمه، قوی عشق اودو جولان ائله سین، گؤر

عشقین داغیدیب، قلب ائوی ویران منی بک له

داندیم سنی گؤردوکده من هر بیر کسی، قان سن

سندن اؤتور آتمیش منی یاران منی بک له

یانسامدا وار اولسامدا حیاتیم سنین اولسون

آتشده یانان کؤنلومه باران منی بک له

عشقیندی منیم باشیمی داشدان داشا چالمیش

مین دردیم اولا هپسینه درمان منی بک له

                            sessiz

آتا

 قورخمارام دونیا بویو کؤنلومه بیــــر داغدیر آتا

گول لـــــرین غنچه لی واختی گؤرونن باغدیر آتا

قولومو کیمسه بورانماز منیم عـؤمـروم بویونو

نییه کی آرخامی توتموش هه له ده ساغدیر آتا

آزمیش ائولادینا پرخاش ائده جک هــر بیــر آتا

دوز یولو گئتمــاغا ویجدان ایله قــالماغدیر آتا

داغی ده ل لم، داشی یوننام،آتا نفسی نن اینان

آتا جرأت دی مــنه، قـورخویــا دوستاقـدیر آتا

اونــودولماز آتــانین زحمتی هئــچ بیــر اوغولا

(سه س سیز)ین وار یوخو هم گؤی لره بایراقدیر آتا

قارانلیق گئجه لر منی سیخماسین

کونلومدن آرزی اومید چیخماسین

منی هئچده کدر غصه سیخماسین

صاباحین گونشینه اومیدلی یم من

سایقی سیز دولانیر گاهدان دویغولار

باشیمدا بول دور جاوابسیز سورغولار

ییخابیلمز منی یالان قورغورلار

صاباحین گونشینه اومیدلی یم من

دنگه له مز منی سورغو سوز سوآل

دور ایسترسن کس باشیمی جانی آل

دیک قالاجاخ تاریخ بویو بو ماحال

صاباحین گونشینه اومیدلی یم من

کندیمدن میلیون سورغو سورموشام

آرخاسیزین آرخاسیندا دورموشام

مین گئجه اومیدله باشا وورموشام

صاباحین گونشینه اومیدلی یم من

اکبر رضایی(سس سیز)

بوگون وادی رحمت مزارلیغیندا یازیچی و هونرمندلر قطعه سینده مزارا اوغرامیش آتام و قارداشیمین مزارلارینین زییارتینه گئتدیم

قارداش نیسگیلی

قانادلانیب اوچان کیمی

اوچوب گئتدین اوزاقلارا

سن بیر گؤزه ل مارال کیمی

منی گؤروب دویان کیمی

آیاقلانیب دؤرد آیاقا

قاچیب گئتدین اوزاقلارا.

سنسیز حیات منه داردیر

خاطیره لر تکجه یار دیر

گؤزه ل گؤیچک خوش قوخولو

گول چیچک لر منه خاردیر.

سن بیر اؤتگون قاسیرغا تک

الده ن آلیب وار یوخومو

بر باد ائتدین آز چوخومو.

سن گئده لی، منده گئتدیم

مزارا قویدولار سنی...

ایتیردیلر هاممی منی.

او گونومده ن ایتیرمیشم

هم سؤزومو هم اؤزومو

داها گه لمیر اینان قارداش

سنسیزلیییه جان دؤزومو.

... کاش منی ده آپارایدین

یان یانا قول قولا قویوب

بیر دفه لیک یاتیب اویوب

باتمییئی دیق بو غصه یه

سون قویایدیق بو قصه یه.

بری گه­ل

دیند­یـرمه یازیـق کؤنلومو جانان بری گه­ل

دان اولدوزو سان سئوگیلی جانان بری گه­ل

آهسته سیـزیلدار ده­لـی کونلـوم هارای ائتمز

ای شـاعیر ایچین دین ایله ایمــان بری گه­ل

یاندیـردی منیـم کونلومـو سئــودانیـن اودو

ای جان جییه ریم آفت دوران بــری گـه­ل

سنسـیز نـه دئییـب سویله سین آتشده یانان

روحــوم دا جانیم دا سنه قوربــان بـری گه­ل

عــشقیـله یـاشـار دونیـادا هـر آن اوره­ییــم

ای کـؤنلـوم ایچیــن دردیلـه درمان بری گه­ل

سسیــز دولاشـیر قلبــی هر آن فیکـر خیالین

ویــرانه وجـودومــداکی ایمــان بری گــه­ل

سنــسیز نه بلالـــر چــکیرم سؤیــله مـه­ره­م

ای کونــلومــون آمــالینا سامــان بــری گه­ل

 SASSIZ

ده لی کؤنول 

اود اوسته قاینار سو کیمی

جوشوب داشیر ده لی کؤنول

گؤی ده  قاچان بولوت کیمی

داغلار آشیر ده لی کؤنول

سنسیزلیغین ازیر منی

گؤزون آلیب اسیر منی

وورغون اولوب گزیر سنی

سنسیز چاشیر ده لی کؤنول

sessiz

مندن دیله ای سئوگیلی جانان نه دیلرسن

ظن ائت نه کئچیر حالیما سنسیز، نه بیلرسن

گؤز یاشلاری دریا کیمی دولموش گؤزوم ایچره

یاندیرسادا گر، سن نه بیلرسن نه سیلرسن

ظولم ائیله مه یه تانری وئریبدیر سنه فرمان

اود توتموش اوره ک اوستونه، بیلمم سو چیلرسن؟؟؟!!

سن مورشودوم اول منده مریدین گئجه گوندوز

شمس اولسان اگر سن، منی فرزانه بیلرسن

(سه س سیز) باخیرام کؤنلوم آلوولارلا قالانمیش

یوخ سؤیله مه رم، سؤیله اگر جانی دیلرسن؟!!!

دیلیــم تورکی ســــؤزوم تورکی اؤزوم صهــــــبایه دیلداده
نه دورموشسان ســــن ای ساقی گه تیر باده گه تیر باده
سیـــــــزیلدار کؤنلومون تاری هر آن یـــــــــــارین فراغیندا
او جانانسیز بو عــــــــــــــؤمروم بیل گئدیر باده گئدیر باده
وفا و عشق و مئهر ایســـــــــتر بو کؤنلوم نازلی جاناندان
جفـــــــــــــــادن قلب بیــــــــــــچارم چکیر ناله چکیر ناله
گئجه م ظلــــمت و گــــــــوندوزلر تامام قاپ قاره ظلمتدیر
هم آیسیز هم گونشسیز گؤر گؤزوم قالمیش نه بیر حاله؟!!
دل آرامی گـــــــؤره رسم کـــــــــؤنلوم آرامش تاپار هر آن
ایکی دونیاده (سه س سیز) ساز اولار روحوم دوشر حاله
                                                        دوشر حاله

سن کی منی آتیب گئتدین

یوزمین درده سالدین منی

اؤزونو چوخ باها بیلیب

چوخدا اوجوز آلدین منی

آلمیش ایدین اوجوز منی

اونوتموشام او دردیمی

نییه اوجوز ساتدین منی

من نه ائدیم بو دردیمی؟

sassiz

سئودادان اگر آنلاماسان، دینمه دانیشما

اینسانلارینان بیر یئره وارساندا، قاریشما

سئوداسیز اولان کس لر اولار مایل سئودا

ایچده ن اگر اول سئوگینی آلمازسان آلیشما

اینسان لاری سئودا یاشادار یوز نئچه مین ییل

سئوداسیز اولان کس سن اگر یات و چالیشما

دیندیردی منیم کؤنلومو سئودا گه تیره ن سه سس

عاشیق کی دئییلسن من ایلن بوردا یاریشما

«سه س سیز» جه گه لر عشق اودو آتشده یانارسان

بیهوده باخیب چئوره نه بیهوده چالیشما

 عزیزلر هامینیزا سایقی لارلا. کدرلی کئچیردییم بیر آنین یئنی تؤحفه سی...

دوشموش جانیما آتش هیجران اؤلوره م

آتمیش منی اول سئوگیلی جانان اؤلوره م

غم بزمیدی آچمیش قوجاغین کؤنلوم اوچون

اولماز منیم احوالیما درمان اؤلوره م

یارسیز نه بلالر چه کیرم بیلمه لی دیر

یار اولسا وئره ر حالیما سامان اؤلوره م

هر کسله برابر یاشادیم دوست اولالی

یوخدور داها چئوره مده کی یاران اؤلوره م

سَسسیز یاشیرام چون سَسیمه سَس وئره نیم یوخ

آتمیش منی چون یاریله یاران اؤلوره م

و بیر عزیز دوستون ایسته ییله بئله سیده گؤزه ل اولور...

SASSIZ

اوزون زامانلار قاباخ عشقیله توپلادیغیم بایاتی لاری کیتاب فورماسینا سالماق هوسینه دوشدوم و باشلادیم اونلاری دوزن له مه یه. بایاتی لار منی ائله دویغولاندیردیکی گؤدوم بایاتی یازماغیم گه لیر... ائله بوردا اونلاری بایاتی سئون لره سونورام. قیسمت اولورسا بودا منیم کئچن ایللرده بوراخدیغیم کیتابلارا تای اوزوموزه گلن یئنی ایلده بیر دادلی دوزلو کیتاب اولاراق وطنداشلاریمین اَلینه یئته جاق.

عزیزیم آغلار گئده ر

قاپیمی باغلار گئده ر

مندن کوسن سئوگیلیم

کؤنلومو داغلار گئده ر

عزیزیم بیلن آغلار

گؤز یاشیم سیلن آغلار

اوزومده سَس سیزم من

ایچیمنن بیلن آغلار

عزیزیم گیله مندن

نار سندن گیله مندن

سن آلدین عاغلیم هوشوم

نه سئوسن دیله مندن

men seni unutmaram
sende meni unutma
gelib yeterem sene
goz yashini gurutma

من سنی اونوتمارام

سنده منی اونوتما

گه لیب یئته رم سنه

گؤز یاشینی قوروتما

سیرلی دیلبر

منــی یاخیــب یانــدیــران او دیلـــبره

ده لی کؤنلوم آغـزین آچیب گه ل دئییر

گؤزونده کـــــی او غمزه نیـــن اوخونا

قان اوره ییم گـه ل منی بیر ده ل دئییر

فه ره کهلیـــک کیــمی سـوزولور آخیر

هر بیــر گــؤره ن گـؤزو یاندیریب یاخیر

مــنه ائلــه خــومار بــاخیــشلا بــاخیر

اوره ک اونــا یــا اؤلومــه گـه ل دئییر

کؤنـول حئیران خـوش یئـریشلی جئیرانا

سنــده بـاخ حئیران اول من تک حئیرانا

باش قاچیــریب گئتسمده مـن هر یانا

نازلــی پری گــه ل مــنی سن آل دئییر

عشـق اودونا یانیب آخیـر کول اولسان

یاداکـی سن وصلـه چاتیب گول اولسان

عشقین ایلـه اوخویوب بـولـبول اولسان

نــازلا ووررام اوره گیـــــــووا خال دئییر

ائشیتمه ییــــر سؤزلــریمین هئچ بیرین

یانــدیرســادا، عشــوه لـری چوخ شیرین

گــؤزلـریمین غمــزه سی نین آچ سیرین

ســازی چــالیب وئــر مـنه بیر حال دئییر

آجــی ده رین معــنالی دیــر بــاخیـشی

تولک تــرلان قـــوشا بنــزیــر آخیــشی

چوح اینــجه دیـــر قاشینــداکی ناخیشی

پوســـــته کیــمی دوداقــلارا بال دئییر

ائل دایـانیب های کوی گه لیر قاباقدان

اود تـؤکـولـور تئـلینـده کــــی داراخدان

بــوگون کئچــدی سازی گؤتور صاباحدان

یانیــخ کــرم کؤیره ک دیلقم چال دئییر

(سه س سیز)دئییر آز قالیر گول تک سولوم

بیلــمیره م کــی مــن آغــلاییم یا گولوم

مــنی قــویمور هئــچ یـــاخیــنا او گولوم

کوسنــده ده گئتـــمه دئـــــییر قال دئییر.

Sassiz

بیری گوله یا بولبوله

بیری سنه بیری منه

یا سن منه یا من سنه

بیری داغا بیری باغا

بیری ده کی چؤل باییرا عاشیقدیر

بیری قیشا بیری یایا

یا پاییزا یا باهارا

او قارایا منده آغا

یا او آغا من قارایا

بیری یازیب یاراتماغا

چوخلاری دا یاشاماغا عاشیقدیر

آمما عزیز موعللیمیم منیم

تای توش ایچینده دیرچه لن

اؤزونه بیر تکان وئره ن

غئیرت ایله دوروم دییه ن

ایسته ییمی سوروم دییه ن

شوجاعت له و جورئت له

باش قووزاییب گؤیه قالخان

منیم جانسیز بارماقیما عاشیقدیر.

مینلر سورغو سورماغیما عاشیقدیر.

بو جانسیز بارماغیمدا او

دونیالارجا سورغو گؤرور

منیم گه لن گونلریمه

گه له جک ده حیاتیما

دیرچه لن بیر دورغو گؤرور

همده منیم بارماغیمدان

منه حیات منه اینام

اؤزونه ده سیناق وئریر.

او قاتلانان بارماقلارا

هئچده باخمیر نظر سالمیر

جان قوربان ائیله ییر اینان

باش قووزایان تک بارماغا.

باش قووزایان او بارماقلا

حیات یولون ایشیقلادیر

سئوگی یاپیر کؤنول سوکور

چنته سینده هر نه کی وار تؤکور.

بیر گون اوزومه اوز سالیب

دئدیم عزیز موعللیمه

بیر کلمه ده آچیقلا سن

حیات نه دیر دئنه ن منه.

دئدی عزیز گوزه ل بالا

حیاتدا هر نه اولسادا

هامیسی (سه س سیز) دانیشان

شجاعتلی و غئیرتلی

باش قووزاییب گؤیه قالخان

سیرلی سوال لی عشقلی

بالاجا تک بارماقدادیر.

 A.R sassiz