شعیرلریم کؤنلومو تیتره دن دویغولاریم دیرلار، اونلاری چوخ سئویرم. هر شعریمده بیر جانیم یاشاییر.

ته له س سن

گیلئی ائتمه حیاتادان بو دونیادان

دئییب گولوب دانیشماغا ته له س سن

سیزیلداما کدرلنمه غم یئمه

عشق اودوندا آلیشماغا ته له س سن

 

حیات کئچیر آغلاساندا گولسن ده

بو سیر سؤزو آنلا دوشون بیل سن ده

اینسانیق بیز بولبول منده گول سنده

اوزاق گئتمه قاریشماغا ته له س سن

 

گئجه کؤچر آیدین گونش نور ساچار

قارانلیقلار بوتون باش توتوب قاچار

آیدین گونش کدرلی قلبی آچار

کوسمه بوگون باریشماغا ته له س سن

 

سئوگی وئریر حیاتیمیزا قیمت

باشقا یولو عشقیمیز آچیر البت

یاشاماغا اینسان اوره یی زینت

محبتده یاریشماغا ته له س سن

 

باشی اوجا کؤنلو آچیق دولاندیق

زمانه نین بوروغوندا بولاندیق

کیمسه لره باش ایمه یه اوساندیق

صداقتله له چالیشماغا ته له س سن

 

گه لدی گئده ر اولدو بو بئش گون حیات

آزیمی دا همیشه بیلدیم زیاد

بیز گئده ریک قالار یئنه بو بساط

عشق اودوندا آلیشماغا ته له س سن

صداقت له چالیشماغا ته له س سن

+ نوشته شده در  31 Dec 2013ساعت 11 AM  توسط اکبر رضایی  | 

دارالدیب

غصه لریم غم داغینی یارالدیب

فلک منیم ائل باغیمی سارالدیب

هیجران دوروب دووار کیمی قارشیمدا

گؤزلریمین لاپ آغینی قارالدیب

 

غم غصه سیز یاشاییردیم ائلیمده

فلک ووردو سیندی قولوم. بئلیم ده

هئچ بیری ده قارا قالمیر تئلیمده

حیات سولو هم ساغیمی دارالدیب

 

کدر منی مین بیر درده قالادی

بیرجه ایچیم سویا زهر جالادی

آغی منه سانکی شیرین لالادی

کدر منده ن گؤر بیر نه لر یارالدیب

 

غم دولاشیر تئل لریمده بیر به بیر

غصه منیم کؤنلومو دیبده ن که سیر

دادلی گونلر چوخ گئدیر آز آز گه لیر

شیرین یولو آجی یوللار دارالدیب

 

سه سیم گه لمیر ائشیتمیرسن غمیمی

سه س سیزم من بوغموشام اؤز سه سیمی

یاشامازسان بیر آن بیرجه دمیمی

فلک بوتون یول به ره نی دارالدیب

+ نوشته شده در  31 Dec 2013ساعت 11 AM  توسط اکبر رضایی  | 

ایلک سئودا

من ایندیده ن خوشوم گلیر

سونرالاری سئومه ییرم

بو آن بوگون حایات دیر

یارین لاری گؤرمه ییرم


سن اولدوز اول سن گونش اول

تورپاغ اولوم باخیم سنه

سئوگی پایلا حایاتیما

بو کؤنلومو یاخیم سنه


سن اینسان اول دوشونجه لی

من قول اولوم عؤمور بویو

سن راحات اول منده راحات

آی عشقیمین ایلکی سونو

sessiz


+ نوشته شده در  5 Sep 2013ساعت 4 PM  توسط اکبر رضایی  | 

 عاشیق قارداش

عاشیق قارداش غصه لنمه غم یئمه

گلر بیر گون سن آختاران او باهار

سئوینج آلار سنین کؤنول باغینی

قوجاغیندا گلر سئوگیلین یاتار

 

بؤیله گلمیش بؤیله گئده ر بو زامان

کیمسه دن یوخ نه بیر صدا نه هایان

محبتی هم ساتان وار هم آلان

عجب یئردی عجب یورددی بو دییار

 

روزگاریمیز هایلی هویلو دولاندی

حسرتیله گؤزلریمیز سولاندی

سئوگیلیمیز قان یاشینا بولاندی

بؤیله گئتسه هاممی جانینا قییار

 

سه س سیز گه لیب سه س سیز گئدیر غم کدر

درد سونوندا منی ییخار یا اَزر

کدرله غم مزار داشیمی بَزه ر

 بیر گون اولار منده گونشیم باتار

sessiz

+ نوشته شده در  21 Jun 2013ساعت 3 PM  توسط اکبر رضایی  | 

 داها کدر بسدی بیزه به سیمیز

غصه کدر بوراخماییر پئشیمی

سانکی ائکیز دوغولموشوق ایکیمیز

دردیم آرتیر یاشلاندیقجا هر بیر آن

یاددان چیخیر هر کیمسه میز که سیمیز

 

آمما سئوگی بو کؤنلومده جانلانیر

سئوگی جوشور زامان سانکی دال قالیر

عؤمر عاشیقی تامام سئوگی دن چالیر

قوی اوجالسین یاشاماقلا سه سیمیز

 

گه لیب گئدن بیر روزگارا بنزه دیق

عؤمور بویو سئوگیلینی گؤزله دیق

یار گلمه دی گئجه گوندوز ایزله دیق

داها کدر بسدی بیزه به سیمیز

+ نوشته شده در  21 Jun 2013ساعت 3 PM  توسط اکبر رضایی  | 

سنسیز یاشاماق دردایمیش ای سئوگیلی جانان

غم غصه کدر هر گئجه مهمانیم اولورلار

عشق عالمی نین وورغونو آسوده قالانماز

اوندان دی گؤرنلر منیم حئیرانیم اولورلار

 

سنسن منیم هر آنداکی فیکریم و خیالیم

کؤنلومدور اینان غصه لی هم باشی بلالیم

یان گزمه گؤزوم نورو گه لیب گؤرده بو حالیم

دورگه ل کی قدم لر منه درمانیم اولورلار

A.R.SESSIZ

+ نوشته شده در  4 Jun 2013ساعت 4 PM  توسط اکبر رضایی  | 

سنسیز اولمور

سنی منده ن آییرانا سؤزوم وار

 منده اینان حیات بویدا دؤزوم وار

اودا سویا دوشوب یولدان کئچه ره م

اوزون ایللر سنده منیم گؤزوم وار

 

سنسیز اولمور سنسیز لال دی بو کؤنلوم

بوتون دولو قالماقال دی بو کؤنلوم

هر آن سنله هم خیال دی بو کؤنلوم

سنی گؤرسم سنه چوخلو سؤزوم وار

سنی گؤرسم سنه چوخلو سؤزوم وار

         A.R...SESSIZ

+ نوشته شده در  4 Aug 2012ساعت 6 PM  توسط اکبر رضایی  | 

گول

گیزلی قالمیش کؤنول داغی دئییلسن

اوره ک سیخان آخشام چاغی دئییلسن

گؤزه ل یارسان سن کی یاغی دئییلسن

گول گول اوچون گولده گولسون سن اوچون


قاباقجیل اول اویناماغا گولماغا

جان آتما سن سارالماغا سولماغا

فیکیر وئرمه غم کدره دولماغا

گول گول اوچون گولده گولسون سن اوچون


مئهریبان اول دوستونا هم دوشمنه

کؤنول وئرسین یاغی سنه یار سنه

همیشه لیک بیرجه سؤزوم وار سنه

گول گول اوچون گولده گولسون سن اوچون


بوگون وارام صاباح یوخام بلکه ده

من اینسانام سئوگیلی یم هر کسه

آغلاما هئچ حیاتیندا بیر کره

گول گول اوچون گولده گولسون سن اوچون


گولوش وئره ر حیاتا یئنی لیک لر

یئتر بیر گون سونا بو دیری لیک لر

غرورسوز اول بار وئرمز ایری لیک لر

گول گول اوچون گولده گولسون سن اوچون


خوش باخیش اول قوجایا هم جاوانا

اومید قالما باش اوستونده تاوانا

دؤزوملو اول توخلوغا هم یاوانا

گول گول اوچون گولده گولسون سن اوچون


بو حیاتا دردده غصه ده یاردی

گئنیش دونیا بؤیوک اینسانا داردی

اولسون کی غم کدرده واردی

گول گول اوچون گولده گولسون سن اوچون

 

دئییب گولمک اینسانی شنلندیره ر

یئری گؤیو داشی دا دیللندیره ر

غصه هردم حیاتی لیللندیره ر

گول گول اوچون گولده گولسون سن اوچون

A.R....SESSIZ

+ نوشته شده در  23 Jul 2012ساعت 0 AM  توسط اکبر رضایی  | 

بیر آن عؤمرو

عزیز یولداش سه سین گه لمیر نه واخ دیر

تئلیم ایچره بارماخلاریم داراخ دیر

گئجه لرده کؤنلوم فیکریم اویاخ دیر

عشق اودیله آلوولانیب آلیش یان

منی آنلا منی دوشون منی قان

 

حیات بیزیم بیر کئچه ری یولوموز

قوشالاشمیر ساغیمیزلا سولوموز

داها گه لمیر یاغموروموز دولوموز

برکتسیز اولوب یام یاشیل اورمان

منی آنلا منی دوشون منی قان

 

سئوگی داها یالان سؤزه بنزه ییر

سینیق شوشه یئرده گؤزه بنزه ییر

الده ن گئده ن کؤنلوموزه بنزه ییر

گونش باتدی بیر آز سونرا باتار دان

منی آنلا منی دوشون منی قان

 

یاشاماقدیر شیرینلیغی حیاتین

کؤچوب گئدیب چوخدا بؤیوک سلاطین

یاشاماسان اؤلوم چاپار قیر آتین

یئه ایچ و گول طبیعتی سن دولان

منی آنلا منی دوشون منی قان

 

کئچمیش آنلار گئری دؤنمز بیرجه آن

غم ائیله مه غصه یئمه بیر دایان

سوندا بیر دیر آنلایانلا اوینایان

کیمسه ده ن یوخ نه بیر خبر نه هایان

منی آنلا منی دوشون منی قان

 

پاسلی دمیر سانکی کؤز تک گؤرونور

یاشامایان حیات بویو سورونور

بوتون عؤمرون بوش زحمته بورونور

کئچمیشی سیل گه له جه یی آتگینان

بو بیر آنی یاشاگینان قانگینان

                    A.R... SESSIZ

+ نوشته شده در  10 Jun 2012ساعت 4 PM  توسط اکبر رضایی  | 

قارانلیق گئجه لر منی سیخماسین

کونلومدن آرزی اومید چیخماسین

منی هئچده کدر غصه سیخماسین

صاباحین گونشینه اومیدلی یم من


سایقی سیز دولانیر گاهدان دویغولار

باشیمدا بول دور جاوابسیز سورغولار

ییخابیلمز منی یالان قورغورلار

صاباحین گونشینه اومیدلی یم من


دنگه له مز منی سورغو سوز سوآل

دور ایسترسن کس باشیمی جانی آل

دیک قالاجاخ تاریخ بویو بو ماحال

صاباحین گونشینه اومیدلی یم من


کندیمدن میلیون سورغو سورموشام

آرخاسیزین آرخاسیندا دورموشام

مین گئجه اومیدله باشا وورموشام

صاباحین گونشینه اومیدلی یم من

اکبر رضایی(سس سیز)

+ نوشته شده در  2 Jun 2012ساعت 9 AM  توسط اکبر رضایی  | 

سیرلی دیلبر

 

منــی یاخیــب یانــدیــران او دیلـــبره

ده لی کؤنلوم آغـزین آچیب گه ل دئییر

گؤزونده کـــــی او غمزه نیـــن اوخونا

قان اوره ییم گـه ل منی بیر ده ل دئییر

 

فه ره کهلیـــک کیــمی سـوزولور آخیر

هر بیــر گــؤره ن گـؤزو یاندیریب یاخیر

مــنه ائلــه خــومار بــاخیــشلا بــاخیر

اوره ک اونــا یــا اؤلومــه گـه ل دئییر

 

کؤنـول حئیران خـوش یئـریشلی جئیرانا

سنــده بـاخ حئیران اول من تک حئیرانا

باش قاچیــریب گئتسمده مـن هر یانا

نازلــی پری گــه ل مــنی سن آل دئییر

 

عشـق اودونا یانیب آخیـر کول اولسان

یاداکـی سن وصلـه چاتیب گول اولسان

عشقین ایلـه اوخویوب بـولـبول اولسان

نــازلا ووررام اوره گیـــــــووا خال دئییر

 

ائشیتمه ییــــر سؤزلــریمین هئچ بیرین

یانــدیرســادا، عشــوه لـری چوخ شیرین

گــؤزلـریمین غمــزه سی نین آچ سیرین

ســازی چــالیب وئــر مـنه بیر حال دئییر

 

آجــی ده رین معــنالی دیــر بــاخیـشی

تولک تــرلان قـــوشا بنــزیــر آخیــشی

چوح اینــجه دیـــر قاشینــداکی ناخیشی

پوســـــته کیــمی دوداقــلارا بال دئییر

 

ائل دایـانیب های کوی گه لیر قاباقدان

اود تـؤکـولـور تئـلینـده کــــی داراخدان

بــوگون کئچــدی سازی گؤتور صاباحدان

یانیــخ کــرم کؤیره ک دیلقم چال دئییر

 

(سه س سیز)دئییر آز قالیر گول تک سولوم

بیلــمیره م کــی مــن آغــلاییم یا گولوم

مــنی قــویمور هئــچ یـــاخیــنا او گولوم

کوسنــده ده گئتـــمه دئـــــییر قال دئییر.

Sassiz

+ نوشته شده در  31 Jan 2011ساعت 8 PM  توسط اکبر رضایی  | 

گه ل مه ره م

گه ل گئت گه ره ک دوست ائوینه یانینا
گؤروب گولوب سئویله سن شانینا
آند ایچیرم حیاتین بو آنینا
سن گه ل مه سن منده سیزه گه ل مه رم

من گه لنده سئوینرسن گولورسن
شادلیغیندان پارتلاییرسان اؤلورسن
چوخداندیرکی گؤروشومه گه ل میرسن
سن گه ل مه سن منده سیزه گه ل مه رم

دولان بیر گه ل گؤر یوردومو اؤزومو
کؤنلومو آل سیل بو آغلار گؤزومو
یاددا ساخلا بو بیر کلمه سؤزومو
سن گه ل مه سن منده سیزه گه ل مه رم

سه س سیز م من سه س سیز یاشییب اؤل لم
گه ل سن اگر حیاتی سنله بؤللم
سنسیز لیکده ن آغلارام همده اؤل لم
سن گه ل مه سن منده سیزه گه ل مه رم

A.R sassiz
+ نوشته شده در  12 Sep 2010ساعت 1 AM  توسط اکبر رضایی  | 

یاشاماق
اؤلومدن سؤز آچیب دانیشما منه

یاشاماق ایستیره م گولمک ایستیره م

گول چیچه یی داغی چؤلو ده ره نی

کؤنلومه دولدوروب سئومک ایستیره م

 

حیات یاشاماق، وارلیق دیر یاشام

عؤمورله، حیاتی گه ره ک دیر آشام

اؤلومله یوخ، آ یولداش قویما چاشام

حیاتی یاشاملا بؤلمک ایستیره م

 

یاشام دیر حیاتا مئیدانلار آچیر

قارانلیقدا گه لیر گونشده ساچیر

اؤلوم، تکجه حیاتا قیمت آچیر

اؤلمک ایسته میره م گولمک ایستیره م

بوتون اینسانلاری سئومک ایستیره م.
+ نوشته شده در  20 Apr 2010ساعت 11 AM  توسط اکبر رضایی  | 

 یارالدیب

غصه لریم غم داغینی یارالدیب

فلک منیم تئل باغیمی سارالدیب

هیجران دوروب دووار کیمی قارشیمدا

گؤزلریمین لاپ آغینی قارالدیب


غم غصه سیز یاشییردیم ائلیمده

فلک ووردو سیندی قولوم، بئلیمده

هئچ بیری ده قارا قالمیر تئلیمده

حیات سولو هم ساغیمی دارالدیب


کدر منی مین بیر درده قالادی

بیرجه ایچیم سویا زهر جالادی

آغی منه سانکی شیرین لالادی

کدر مندن گؤر بیر نه له ر یارالدیب


غم دولاشیر تئللریمده بیربه بیر

غصه منیم کؤنلومو دیبدن که سیر

وای او گونه ایگیدلر اولسون اسیر

شیرین یولو آجی یوللار دارالدیب


سه سیم گه لمیر ائشیتمیرسن سه سیمی

سه س سیزلیقدا بوغموشام اؤز غمیمی

یاشامازسان بیر آن بیرجه دمیمی

فلک یولو هم به ره نی دارالدیب

+ نوشته شده در  22 Jan 2010ساعت 5 PM  توسط اکبر رضایی  | 

 

یاناشسا


گولشن اولار چیچک له نر یئر اوزو

اینسان اگر اینسان ایلن یاناشسا

گه لر باهار اوخور بولبول گولر ائل

اینسان اگر اینسان ایلن یاناشسا

 

بیرلیک اولار گول جمال لار ئوپوشر

آیری دوشن باجی قارداش گؤروشر

وصال گه لیب آیریلیقدان اؤتوشر

اینسان اگر اینسان ایلن یاناشسا

 

دوشونن کس قولاق وئرسین هاییما

های وئرسین لر هاراییما هاییما

جنت اولار فانی دونیا هامییا

اینسان اگر اینسان ایلن یاناشسا

 Sassiz

+ نوشته شده در  30 Aug 2009ساعت 2 PM  توسط اکبر رضایی  | 


شاعیر


شاعیر وار دانیشیر امیددن آرزودان

شاعیر وار امیدلرله بیگانه دیر

شاعیر وار دانیشیر بوتون گؤزه ل لیکدن

شاعیرده وار طبیعتله دیوانه دیر


شاعیر وارکی کؤنول لرین جان سؤزودو

عشقین مئهرین محبتین تام اؤزودو

ویجدانلارین صداقتین جوت گؤزودو

شاعیرده وار شعری شمع و پروانه دیر


شاعیر وار نه دیندیر نه دانیشدیر اونو

شاعیرده وار دویغودان گئییبدیر دونو

شاعیر وار تکجه گوله سونبوله قونو

شاعیرده وار اؤلکه سینه دیوانه دیر


شاعیر وار اونو نه آرواد نه کیشی سان

شاعیرده وار گؤزونده یوخدور اصلا قان

شاعیرده وار چکینیر قورخور دونیادان

شاعیرده وار دئییر ترس و پروا، نه دیر.

Sassiz

+ نوشته شده در  23 Aug 2009ساعت 1 PM  توسط اکبر رضایی  | 

  ترجومه

  ( انگلیس دیلینده ن ترجومه   اکبر رضایی    سه س سیز )    


دیل آچـارکن سؤیله دیلر قولاق آس

اوینامـاغین واختی تاپدی ایش منی

زحمـت ایله تاپدیم من اوز ایشیمی

ســـؤیله دیـلر ائولندیرک گه ل سنی  


بئش اون ایلده تاپدیم اوشاقلاریمی

حیــات دولدو منیــم قورشاقلاریمی

آنــلایـارکــن من اؤز اوشــاقلاریمی

اونــلار آتدی قــویــدولار تنــها منی  


عؤمور گئچدی جاوانلیغیمی ایتیردیم

اینـدی منـی یادا سالان کیمدی کیم

ایسـته دیم کی یاشاماغی اؤیره نیم

دء دیــلر کــی ایستیر او دونیــا سنی


محبت

  معناسی دیر حیاتین

زیروه سی دیر جاهانین

اوجالانمیش بنانین

بناسی دیر اینانین

سئوگی سئوگی محبت

اوزلوگونو دانانین

وارلیغینی آتانین

غیرتینی ساتانین

توبه سی دیر اینانین

سئوگی سئوگی محبت

گؤزو دولموش آنانین

عشق اودونا یانانین

عؤمور سونسوز سانانین

سون سؤزودور قانانین

سئوگی سئوگی محبت

یا دوستوم اول یا یاغی

گه ل بیر گه زه ک بو باغی

انسانلارین دایاغی

اؤرنک اولموش سایاغی

سئوگی سئوگی محبت

تکلیک غملی دونیادیر

درد له دملی دونیا دیر

یاسلی شانلی دونیادیر

سنله منلی دونیا دیر

سئوگی سئوگی محبت

توبه سیزین توبه سی

گنج آنانین کؤرپه سی

اولو روحون کؤوده سی

سعادتین زیروه سی

سئوگی سئوگی محبت


Normal 0 false false false EN-US X-NONE AR-SA MicrosoftInternetExplorer4 + نوشته شده در  31 May 2009ساعت 10 AM  توسط اکبر رضایی  | 

مزار داشیما


قارا بولوت آلدی فیکیر دونیامی

یاغدی قاتدی توپراغی دا اوستومه

ائله چیسکین ائله دومان اولدوکی

دئییلمه دی بیر آغی دا اوستومه


یئر قارالدی گؤی قارالدی گؤزوم تک

زامان دوردو آغزیمداکی سؤزوم تک

داشا دؤندو آرزیلاریم اؤزوم تک

آخ دئمه ره م قوی داغی دا اوستومه


من سئوه ردیم آی اولدوزلو گئجه نی

اینسانلارلا سازلی سؤزلو گئجه نی

توی گئجه سی دادلی دوزلو گئجه نی

ایندی گه لمیر بیر چاغی دا اوستومه


قارا پالچیق توتدو آیاقلاریمی

الده ن آلدی منیم دایاقلاریمی

قارا یازی آلدی واراقلاریمی

آغلا(سه س سیز) بیر آغی دء اوستومه

+ نوشته شده در  20 May 2009ساعت 12 PM  توسط اکبر رضایی  | 

 

 

گه ل مه ره م


گه ل گئت گه ره ک دوست ائوینه یانینا

گؤروب گولوب سئویله سن شانینا

آند ایچیرم حیاتین بو آنینا

سن گه ل مه سن منده سیزه گه ل مه رم

 

من گه لنده سئوینیرسن گولورسن

شادلیغیندان پارتلاییرسان اولورسن

چوخداندیرکی گؤروشومه گه ل میرسن

سن گه ل مه سن منده سیزه گه ل مه رم

 

دولان بیر گه ل گؤر یوردومو اؤزومو

کؤنلومو آل، سیل بو آغلار گؤزومو

یاددا ساخلا بو بیر کلمه سؤزومو

سن گه ل مه سن منده سیزه گه ل مه رم

 

(سه س سیز) م من سه س سیز یاشییب اؤللَم

گه ل سن اگر حیاتی سنله بؤللم

سنسیز لیکده ن آغلارام همده اؤللَم

سن گه ل مه سن منده سیزه گه ل مه رم



دنیا منده ن نه ایسته ییر بیلمیرم


یئنه بیلمرم نه غوغادیر باشیمدا

چاتیلیبدیر آغاران تئل قاشیمدا

قوجالمیشام من بو جاوان یاشیمدا

دنیا منده ن نه ایسته ییر بیلمیرم

 

غمه دولدوم آغلار گؤزوم آغلادی

قارداش اؤلدو اورییمی داغلادی

فلک منیم قوللاریمی باغلادی

دنیا منده ن نه ایسته ییر بیلمیرم

 

بو دردیمی سو دا داش دا آنلادی

قوهوم قارداش بوگون منی یانلادی

گه لیب  گئده ن های منی دانلادی

دنیا منده ن نه ایسته ییر بیلمیرم

 

بوراخ منی بیر هؤکوروم آغلییم

بو فلکین الین قولون باغلییم

یئرین گؤیون اوره یینی داغلییم

دنیا منده ن نه ایسته ییر بیلمیرم

 

+ نوشته شده در  26 Dec 2008ساعت 10 AM  توسط اکبر رضایی  |